Kirkjuvogskirkja
Kirkjuvogskirkja í Höfnum er elsta kirkja á Suðurnesjum en hún var byggð árin 1860-61. Það var Vilhjálmur Kr. Hákonarson sem lét byggja kirkjuna á eigin kostnað. Sagan segir að hún hafi kostað 300 kýrverð. Á árunum 1970-72 var kirkjan endurreist frá grunni og færð til upprunalegs horfs. Kirkjan var friðuð árið 1990 vegna aldurs.
Hafnir
Hafnir var sjálfstætt sveitarfélag en sameinaðist Keflavík og Njarðvík árið 1994 þegar Reykjanesbær varð til. Rúmlega 100 manns búa í bænum og hefur íbúafjöldi haldist svipaður í áratugi. Árið 1881 strandaði seglskipið Jamestown við Hafnir en það var að flytja timbur frá Boston til Liverpool. Timbrið var selt á uppboði og m.a. notað í hús og brúargerð víða um land. Annað akkeri Jamestown er fyrir utan Kirkjuvogskirkju.
Vissir þú?
Rétt sunnan við Hafnir er Merkines en þar standa nokkur íbúðarhús. Systkinin Ellý Vilhjálms og Vilhjálmur Vilhjálmsson ólust upp í Merkinesi. Ellý hét Henný Eldey en þegar horft er til hafs frá Merkinesi þegar útsýni er gott blasir Eldey sjálf einmitt við.
Dagur í Reykjanesbæ 